di Enzo Mammato e Antonio Serra

Nonna, ca mme strigne, ogne mumènto, ‘mbraccio a tte: mme guarde fisso e t'annàscunne ‘o chianto!

I' saccio che vuò di' quanno 'nzìno mme piglie: ca i' aggio perzo ‘a mamma e tu na figlia!

Na figlia ca pe' tte era tutta na vita pe' mme ‘a carézza ‘e n' angelo ca se n'è partuto!

Vurria c' ‘a séra nun venèsse maje pe' stu cielo ca se fa ‘scuro attuorno a mme!

Chi tène ‘a mamma vède sèmpe chiaro: è nu raggio ‘e sole sott' ‘o titto sujo!

Quali recchézze pò eguaglia' stu bbene? Basta tuccarle ‘a mana e te truove nu tesoro!

I' l'aggio perza a sulo unnece anne e mò, è n'anno già, ca nunn 'a tèngo cchiù,

ma tèngo a tte, nonna, ca mme vuò tantu bene e mme daje tutto

pe' nu mm' ‘a fa' penza', ma comme faccio si pure ‘int' ‘e prèjere

t' arracumanne ‘e mme fa' di': "Madonna mia, guarde a mammà!" ???